Monday, November 20, 2017

சுடச்சுட சக்கரைப் பொங்கல் ! (இந்திய மண்ணில் பயணம் 78 )

நன்றி சொல்ல வந்துருக்கோம். ஒரு மரியாதைக்கு  மாலை போட்டு  சக்கர ராஜாவைக் கும்பிடலாமுன்னு தோணுச்சு!  பூமாலை ஒன்னு  வாங்கினோம். கோவில் வாசலில் சிரிச்ச முகத்தோடு   மங்களகரமா இருக்கும் பூக்காரம்மாவிடம், அர்ச்சனைத் தட்டு ஒன்னும் வாங்கிக்கிட்டுக் கோவிலுக்குள் போறோம்.

ரொம்ப விசேஷமானவர் மூலவர். முக்கண் படைத்தவரா இருக்கார்!  உலகத்துலேயே இப்படி இருக்கும் வைணவக்கோவில் மூலவர் இவர் மட்டும்தானாம்!  பெருமாளின் சக்கரத்துக்குன்னே  இருக்கும் ஒரே கோவிலும் இதுதானாம்! 
திருமழிசை ஆழ்வார் இவரைப்பாடி மங்களாசாஸனம் செஞ்சுருக்கார். ஆனால் இந்தக் கோவில் 'அந்த 108 லிஸ்ட்' டிலே இல்லை !!!!      (ஏனாம்?    ஙே......  )
போனமுறை உத்தராயண வாசல் வழியாப்போனோம். இப்ப ஐப்பசி மாசம் நடப்பதால் தக்ஷிணாயண வாசலில் பிரவேசம்.
சக்கரராஜா... சூரியன், பிரம்மன், மார்க்கண்டேயர், அகிர்புதன்ய மகிரிஷி, அக்னிபகவான் ஆகியோருக்கு   நேரில்  தோன்றி தரிசனம் கொடுத்துருக்கார். முகத்தில் வேற  முக்கண்!  அதனால்  இவர்களுரிய செவ்வரளி, செம்பருத்தி, வில்வம், வன்னி, துளசி , குங்குமம் ஆகிய பொருட்களை கொண்டு சுவாமிக்கு அர்ச்சனை செய்யறாங்க.  உலகில் வேறெங்கும் இப்படி இல்லையாம்.

போனமுறை நம்ம துளசிதளத்தில் எழுதுனது இப்படி  :-)


 ரெண்டு அர்ச்சனை சீட்டுகள் வாங்கி இருந்தோம்,  மகள்களுக்காக!  அர்ச்சனை முடிஞ்சதும், நம்ம கோபு  சக்கரைப்பொங்கலைக்  கொண்டு வந்து  சமர்ப்பித்தார்.  அமுது படைச்சாச்சு.


பாத்திரத்தை எடுத்துக்கிட்டு நம்ம கோபு எங்களை வரச்சொல்லிட்டு  படி இறங்கிப்போய்  எதிரிலிருந்த மண்டபத்திண்ணையில்  வச்சுட்டு, ஒரு நிமிஷம் னு சொல்லி எழுந்துபோனார். இதுக்குப் பக்கத்துலேதான் நேத்து நாம் பார்த்த கோபுவின் அறை இருக்கு :-)  இதுதான்   மடப்பள்ளி.   திரும்பி வரும்போது கையில் தொன்னைகள் இருக்கும் பை ஒன்னு .

அங்கே ஏற்கெனவே உக்கார்ந்துருந்த சிலரிடம், ' பிரஸாதம் வாங்கிக்குங்க'ன்னு அழைப்பு விடுத்தேன்.  அவுங்களுக்கு விநியோகம் ஆனதும்,  நமக்கும் கிடைச்சது. நம்மவர் ரொம்ப பயபக்தியோடு வாங்கின மாதிரி தெரிஞ்சது.


அளவான இனிப்பும், நெய்யுமா அருமையான ருசி! அதானே  எத்தனை வருஷமா தினமும்  செய்யும்போது  பிரச்சினை இருக்குமா? அளவெல்லாம் ஒரு ஒழுங்குக்கு வந்துருக்காதா?

கொஞ்சம் எடுத்துண்டு போறேளான்னதுக்கு  வேணாமுன்னு தலையை அசைச்சேன். இன்னும் வரப்போகும் பக்தர்களுக்குக் கொடுத்தால் ஆச்சு! நமக்கு இந்த ஊருலே பெருமாளைத் தவிர வேற யாரைத் தெரியும்?

ஆதிகாலத்தில்  பாயஸமா இருந்த பிரசாத வழிபாடு, எப்போ சக்கரைப்பொங்கலா மாறுச்சுன்னு தெரியலை?   ஒரு வேளை கையில் வாங்கிக்கக் கஷ்டமா இருக்குன்னு மாத்தி இருப்பாங்களோ?  திருக்கண்ணமுது.... இப்போ அக்காரவடிசலா  ஆனது ....



காலையில்  காசியை தரிசனம் செஞ்சுட்டு இங்கே வந்தோமா.... இப்போ  இங்கிருந்து  அயோத்திக்குப் போறோம் :-)  தென்னக அயோத்தி!
எனக்குப் பிடிச்ச கோவில்களில் இதுவும் ஒன்னு! நம்ம ஆஞ்சி இங்கே வீணை வாசிச்சுக்கிட்டு உக்கார்ந்துருக்கார், தெரியுமோ?
கருவறையில் சீதையும் ராமனும்  அரியாசனத்தில்  அமர்ந்த நிலையில் இருக்க, பரதன்  பொற்குடை பிடிக்க, சத்ருக்னன் சாமரம் வீச,  நம்ம லக்ஷ்மணன், வழக்கம்போல் கையில் வில்லும் அம்புமாய் காவலுக்கு நிக்க, அதோ  இந்தாண்டை ஒரு ஓரமா உக்கார்ந்து கையில் வீணையை வச்சு மீட்டிக்கிட்டு இருக்கும் ஆஞ்சிதான் என் ஃபேவரிட்!

முதல்முதலில் இவரைத் தேடி இங்கே வந்தது ....  இங்கே  இப்படி :-)





முன் மண்டபத்துலே மட்டும் அறுபத்தியிரண்டு தூண்கள்! ஒவ்வொன்னும் ஒருன் கலைப்பொக்கிஷம்!  நின்னு பார்க்க இப்பவும் நேரம் இல்லாமல் போச்சு.  ஒரு பயணத்துலே  நாலுன்னு கணக்கு வச்சுக்கிட்டு ஆற அமரப் பார்க்கணும்.

இந்தப்பக்கம் ஒரு அழகுன்னா.... இன்னொரு பக்கம்  அதைவிட....



பிரகாரம் வலம் வந்துக்கிட்டே ராமாயணம் தெரிஞ்சுக்கலாம். குழந்தைகளுக்குக் கதை சொல்லும் பிரகாரங்கள்!  உள்ளூர்க்குழந்தைகள்  கொடுத்து வச்சவங்க. கதையைப் பார்த்துத் தெரிஞ்சுக்கிட்டே போய் முடிக்கும்போது பிரகாரம்  சுத்துன பலன் தானே லபிச்சுரும்!

மணி இப்போ பதினொன்னு சமீபிக்குது.  நாளைக்கு கும்மோணத்தை விட்டுக் கிளம்பிடறோமே....   இன்னும்    இந்த ஊரில் இருக்கும் முக்கியமான  பெருமாள் ஐவரில் இருவரை தரிசனம் செஞ்சுக்கலையேன்னு  நினைக்கும்போதுதான் தாராசுரம் பாதி பாக்கி இருக்குன்றதும் ஞாபகம் வந்தது.

சார்ங்கபாணி கோயில்,
சக்கரபாணி கோயில்
இராமஸ்வாமி கோயில்
ராஜகோபாலஸ்வாமி கோயில்
வராகப்பெருமாள் கோயில்

முதல் மூணு கோவில்களில்தான் திரும்பத்திரும்ப தரிசனம் கிடைக்கறது. கடைசி ரெண்டுபெருமாளும் நம்மீது கருணை காமிக்கலை.  அடுத்த முறை கட்டாயம் போகணும். மூளையில் முடிச்சு :-)

தாராசுரம் போகலாம். பக்கம்தானே....   மூணு கிமீக்கும் குறைவு!  வெய்யில் ரொம்ப ஏறுமுன்  போயிடலாமே....

தொடரும் :-)

Friday, November 17, 2017

காசிக்குப் போகாமலேயே பாவத்தைத் தீர்க்கணுமா? (இந்திய மண்ணில் பயணம் 77 )

ஒவ்வொரு ஊருக்கும் ஒரு பேட்டர்ன் இருக்கே...  காலையில் கண் முழிச்சதும்  இங்கே குளம் பார்க்கணும்.  கரைக்கு  இந்தாண்டை இருக்கும் கோவில் கோபுரத்தைப் பார்த்து கும்பிடு போட்டுக்கணும். சூரியன் வந்துட்டானான்னு  தேடணும் :-)  அதே போல் எல்லாம் ஆச்சு.  கோபுரதரிசனம்  கோடி புண்ணியம் இல்லையோ?
அந்தக் கோவில் என்னன்னு தெரியலையேன்னு....  கெமெரா மூலம்   கோபுரத்தைக் கிட்ட வரவழைச்சுப் பார்த்தேன். காசி விசுவநாத சுவாமி திருக்கோவில் !  போகணுமுன்னு தோணல். இன்றைக்கே போனால் என்ன?

அறைக்குத் திரும்பினால் காஃபி வந்து காத்திருக்கு!  நம்மவர்  சொல்லி இருக்கார்!  அப்போ அவ்ளோ நேரமாவா ஜன்னலாண்டை  நின்னுருக்கேன்!

சட்னு குளிச்சு முடிச்சுத் தயாராகிக் கீழே வந்து ரைஸ் அன் ஸ்நாக்ஸ் போனோம்.  நம்ம  ஹயக்ரீவா போலவே   ராயாஸ்லேயும்   காலை உணவு  ஹொட்டேல் தராது.  அறை வாடகை குறைவு என்பதால் இது பிரச்சனையே இல்லை. தோ....வாசலில் எல்லாம் கிடைக்குதே!

எதிரில் இருக்கும் கோவிலுக்குப்போய்ச் சேர்ந்தோம்.  ராஜகோபுரம் பளிச்ன்னு புது வண்ணங்களோடு இருக்கு.  இங்கே மஹாமகத்து சமயம், இந்தக் கோவிலுக்கு ரொம்பவே மகத்துவம் என்பதால்  இப்போ ஒரு எட்டு மாசத்துக்கு முன் நடந்த கும்பமேளாவுக்காக புதுவண்ணம்  பூசி இருக்கலாம்.
தெருவின் ஆரம்பத்துலேயே கோவிலுக்கு ஒரு அலங்கார வாசல் வேற வச்சுருக்காங்க. ஆனா  இதுலே அஷ்டலக்ஷ்மிகள் இருக்காங்களே!!!
சனம் பாவம் தீர்த்துக்கப் புண்ணிய நதிகளில் போய் நீராடுவது  பழக்கம்.  செஞ்ச பாவம் எல்லாம் அப்படியே  உடம்பில் இருந்து தண்ணியோடு போயிரும்னு ஒரு நம்பிக்கை. (மனசு அழுக்கை  போக்க என்ன பண்ணனும்? )
மக்கள் பாவமூட்டைகள் எல்லாம் புனித நதிகளில் கரைஞ்சு நதிக்கு பாரமாப் போயிருது.  பாவம் இந்த நதிகள்.  எல்லாம் பெண்கள் வேற!  அடுத்தவங்க  பாவத்தைச் சுமக்கும் பெண் ஜென்மங்கள்  :-(
நம்ம நாட்டுலே பாருங்க..... ரெண்டே  ரெண்டு நதிகளைத் தவிர எல்லாமே  பெண் நதிகள்தான்! செவன் அவுட் ஆஃப் நயன்.
ஒரு கட்டத்தில் பாவமூட்டையின் கனம் தாங்கமுடியாமல்  நதிகள் எல்லாம் சேர்ந்து பேசி (நதிநீர் இணைப்பு !) சிவபெருமானிடம்  முறையிடறாங்க. அவரும்  ஐயோ பாவம்.... இந்த நதிகள்னு,   பாவம் போக்கும் உபாயம் ஒன்னு சொல்றார்!
"நீங்க எல்லோரும் காசி மாநகரத்துக்கு  வந்துருங்க. நான் உங்களையெல்லாம் ஒரு இடத்துக்குக் கூட்டிப்போறேன். அங்கே போனதும்  உங்க மேல் இருக்கும் அடுத்தவர்களின் பாவமூட்டை  உங்களைவிட்டு அகலும்."

கங்கை, யமுனை,  சரஸ்வதி, நர்மதா , காவேரி, கோதாவரி,  சரயு, கோதாவரி, சிந்துன்னு எல்லோரும் காசிக்குப்போய்ச் சேர்ந்தாங்க.

காசி விஸ்வநாதரும்  காசி விசாலாக்ஷியுமா, நதிப்பெண்களையெல்லாம் கூட்டிக்கிட்டு  அங்கிருந்து கிளம்பி  பிரளய காலத்தில்  அம்ருதம் நிறைஞ்ச கும்பம் போய்ச்சேர்ந்த   புண்ணிய ஸ்தலமான கும்பகோணம் வந்தாங்க.
இந்த மாஹாமகக்குளத்துலே  இருபத்தியோரு புண்ணிய தீர்த்தங்கள் இருப்பதா ஒரு ஐதீகம்.  நதிப்பெண்களை  இந்த மஹாமகத் தீர்த்தத்தில்  முங்கச் சொன்னவுடன், அவுங்களும் முங்கி எழுந்தாங்க.  சுமந்துருந்த பாவ மூட்டை 'பணால்' ஆச்சு :-)

அப்ப இங்கே வந்த இந்த டூர் க்ரூப் முழுசும் இங்கேயே தங்கி நமக்கு அருள் பாலிக்கிறாங்க. இதுதான் தெய்வ மனசுன்றது!  நம்பும்   எல்லோருக்கும்  கருணை காமிக்க வேணும்!
இங்கே மஹாமகக்குளத்தில் நீராடி,  காசி விஸ்வநாதரையும், காசி விசாலாக்ஷியையும் வணங்கினால் அஷ்ட ஐஸ்வரியமும் லபிக்கும். ஓ.... அதுதான் வரவேற்பு வளைவில் அஷ்டலக்ஷ்மிகள் இருக்காங்களோ!!!!

மற்ற  புண்ணியத்தலங்களில்  பண்ணும் பாவம், காசிக்குப்போனால் தீரும். காசியில் பண்ணும் பாவம், கும்பகோணத்துக்குப் போனால் தீரும்.
கும்பகோணத்தில் பண்ணும் பாவம், இதே கும்பகோணத்தில் தீந்துருமுன்னு  நம்பிக்கை.  எழுதிப்போட்டுருக்காங்க.   நம்பணும். நம்புனால்தான் சாமி !

 அஞ்சு நிலை ராஜகோபுர வாசலுக்குள் நுழையறோம்.  கண்ணெதிரே கொடிக்கம்பம்.  கோபுரவாசலையே 'பார்க்கிங் ப்ளேஸா' பயன்படுத்துது சனம் :-(

கோவிலுக்குள் யாருமே இல்லை......   குருக்கள் கூட காலை உஷத்கால பூஜையை முடிச்சுக்கிட்டு சந்நிதி கம்பிக் கதவைப் பூட்டிக்கிட்டுப் போயிருக்கார்.  ஒருவேளை ப்ரேக்ஃபாஸ்ட்க்குப் போயிருக்காரோ என்னவோ?
உண்மையான ஏகாந்த ஸேவை நமக்கு லபிச்சது!  காசி விஸ்வநாதரையும், காசி விசாலாக்ஷியையும் வணங்கினோம்.   மூலவர் கருவறை வாசல் மண்டபத்தில் நவநதிகளுக்கு ஒரு சந்நிதி. நல்ல ஆளுயரச் சிலைகள். நவகன்னிகைகள் சந்நிதி! நடுநாயகமா  நம்ம காவிரி!
பிரகாரம் வலம் வந்தோம்.   கோஷ்டத்தில் தக்ஷிணாமூர்த்தி!  இவருக்கு ஒரு  கம்பிக்கதவு போட்டுருக்காங்க.  ராயாஸ் உபயம்:-)
சின்ன மாடத்தில் நம்ம ஆஞ்சி. வீர ஆஞ்சநேயர். இன்னொரு மாடத்தில்  மகிஷாசுர 'வ'ர்த்தினி !


கோவில் நல்ல சுத்தமா இருக்கு என்பது  மகிழ்ச்சி.   குருக்கள் இருந்துருந்தால்  கொஞ்சம் கூடுதல் விளக்கம் கிடைச்சுருக்கும்.  படங்கள் எடுக்க அனுமதியும் வாங்கி இருக்கலாம்.  இப்ப நம்ம பொறுப்பே என்பதால் தயங்கித் தயங்கி ஏழெட்டுப் படங்களோடு முடிச்சுக்கிட்டேன்.   இது பாவக்கணக்கில் வருமோ?
வலம் முடிச்சு மூலவரை இன்னொருக்கா கும்பிடலாமுன்னு போனால் பக்தர்  ஒருவர், சண்டிகேஸ்வரர் முன்னால் நின்னு கும்பிட்டுக்கிட்டு இருந்தார்.  கொடிமரத்தாண்டையும் இன்னொரு பக்தர் !  உள்ளூர் மக்கள்னு நினைக்கிறேன். ஒருவேளை  ரெண்டு படத்தில் இருப்பவரும் ஒரே நபர்தானோ?   ஙே.....

பளிங்குக் கல்வெட்டில்  முதலமைச்சரின்  சீர்மிகு பொற்கால ஆட்சியில் குடமுழுக்கு நடந்ததாக ஒரு தகவல். (நாம் அந்தக் கோவிலுக்குப் போனது அக்டோபர் 24, 2016.  அந்த சமயம் உடல் நலமில்லைன்னு  அப்பல்லோவில் இருந்தாங்க.  நலம் பெறணுமுன்னு  அன்னைக்கு வேண்டிக்கிட்டேன். இப்போ இந்தப் பதிவு எழுதும்போது  அவுங்க இந்த உலகில் இல்லை.... ப்ச்..... )

வண்டிக்குத் திரும்பும் போது குளத்தாண்டை அகத்திக்கீரை வித்துக்கிட்டு இருந்தார் ஒருவர்.  கண்ணைச் சுழட்டினால் மாடு ஒன்னும் அப்போ தென்படலை....  இருந்தால்  கொஞ்சம் வாங்கிக் கொடுத்துருக்கலாம். புண்ணியமா இருந்துருக்கும்....






சக்கரராஜா கோவிலுக்குப்போறோம்....  சாலைகளில்  இன்னும்  மக்கள் கூட்டம்  ஆரம்பிக்கலை....   பழைய ராயாஸ் அருகில்  பஸ் நிறுத்தம் ஒன்னு அருமை!!  வெயில், மழை கொள்ளாமல் பஸ் வரும்வரை  உக்கார்ந்து ஓய்வெடுக்கும் வகையில்  இருக்கு!  கும்பகோணம் நகராட்சி நல்லாதான் ஊரை கவனிச்சுக்குது!
கோவில் வாசலில் போய் இறங்கும்போது சரியா மணி ஒன்பதரை :-)

 தொடரும்.....:-)