மௌரியர்கள் ஆட்சியில் அசோகர் கட்டுன ப்ரமாண்டம்............

தாமேக்கா, தம்மேக்கா,  இல்லை தார்மீக்கா இப்படிமனசு பெயரை ஆராய்ச்சி பண்ணிக்கிட்டே இருக்கு.  ஹிந்தி மொழியில்  தாமேகான்னுதான் இருக்கு.  தாமேக் ஸ்தூப்! ஆனால்  கல்வெட்டு ஒன்னில் இதுக்கு பழைய காலத்துப்பெயர்   தர்ம சக்ர ஸ்தூபா 'ன்னு  வெட்டி வச்சுருக்காங்க.  ஆங்கிலத்தில் இருக்கு எழுத்து என்பதால் நமக்குப் படிச்சுத் தெரிஞ்சுக்க முடியுது. இந்தியாவை ஆங்கிலேயர் ஆண்ட சமயம் எழுதி வச்சதா இருக்கணும். இல்லேன்னா.........   ஸ்தூபி கட்டுன காலத்துலே இங்கிலிபீஸ்  நம்ம நாட்டுக்குள்ளே வந்துருக்க சான்ஸே இல்லை கேட்டோ!

எல்லாம் கி.மு. காலத்து சமாச்சாரம் பாருங்க....  ஆழ்ந்து கவனிச்சால்தான் கொஞ்சமாவது புரியும். இதுலே கைடு வேற விட்டுட்டுப் போயிட்டார்.  நல்ல'வேலை'யா  இந்திய அரசின் தொல்லியல் துறை ரெண்டு தகவல்போர்டும் வச்சு, அங்கங்கே கொஞ்சூண்டு விளக்கமும் வச்சுருக்காங்க.

தொல்லியல் துறையின் பாதுகாப்பில் இருக்கும்  புராதனச் சின்னங்கள் உள்ள இடங்களுக்குள் போய் பார்க்கணுமுன்னா ஒரு சிறிய கட்டணம்  உண்டு. நாடு முழுக்க  இவுங்க வசம் இருக்கும் எல்லா  இடங்களுக்கும் வெறும் அஞ்சே   ரூபாய்தான், தாஜ்மஹலைத் தவிர. அங்கே மட்டும் 20 ரூ வாங்கறாங்க. (அதிசயம் பாருங்க.... அதான் விலை ஜாஸ்தி!)  எதாவது புராதனச் சின்னம் பாதுகாக்கப் படுதுன்னா அதைச் சுத்திவர 200 மீட்டருக்கு ஒரு லட்சுமண ரேகை போட்டுருது  தொல்லியல் துறை.  அதுக்குள்ளே போய்  மக்கள்ஸ் யாராவது  'வேலை' காமிச்சாங்கன்னா ரெண்டு வருசம் 'களி' தின்னணும். கூடவே ஒரு லட்ச  ரூபாயும்   அபராதம்.

சுற்றுலாப் பயணிகள் திமுதிமுன்னு  பஸ் பஸ்ஸா வந்து இறங்குறாங்க.  புத்தமதக்காரர்கள் புண்ணிய  யாத்திரையா வந்து போறது ஒருபக்கமுன்னா,  நம்மைப்போல  காசி யாத்திரை வர்ற கூட்டமும் இவ்ளோ பக்கத்துலே இருக்கும் ஊராச்சேன்னு எட்டிப் பார்த்துட்டுத்தான் போறாங்க. வருசம் முழுசும் யாத்திரைக்கார் கூட்டமே!  ஒரு புத்திமுட்டுமில்லாமல்  ஆட்டோவில்கூட வந்து பார்த்துட்டுப் போயிடலாம். வெறும் 13 கிமீ தூரம்தான்  காசி விஸ்வநாதர் கோவிலில் இருந்து!!!


நாமும்  டிக்கெட் வாங்கிக்கிட்டு   உள்ளே நுழையறோம். வாசல் கேட் கூட  சக்கரத்தோடு  அழகா இருக்கு!   சக்கரம்தான்   இங்கே தீம் ! முன்னொரு காலத்தில் பெரிய புத்த மடமா இருந்த இடம். அகழ்வாராய்ச்சி நடத்தி புதையுண்டு இருந்தவைகளை வெளிக்  கொணர்ந்துருக்காங்க.  அருமையான சுட்ட செங்கல் தளங்கள்.  பசுமையான புல்வெளி.

புத்த மடமா?  அதுக்கும் முந்தி , கி.மு. ஆறாம் நூற்றாண்டுலே இங்கிருந்த சமணர்களின் மடங்கள் இவை.  (அப்ப புத்தர் பிறக்கலை கேட்டோ!)  சமணமதம் பரவலாக  இருந்த காலக் கட்டம். கிட்டத்தட்ட மூவாயிரம் சமண பிக்குகள்  இங்கே இருந்துருக்காங்களாம்.  புத்தர்,  தன் மனைவி மக்களை விட்டுட்டு, ஞானம் தேடி  அலைஞ்சப்ப இங்கே  வந்துருக்கார்.   கொஞ்சநாள் இங்கேயே தங்கி, சமணர்களின் சந்நியாச வாழ்க்கைமுறைகளைப் பார்த்து இது 'தனக்கானதல்ல'ன்னு முடிவு செஞ்சுக்கிட்டு அங்கிருந்து கிளம்பி இருக்கார்,  இவுங்க உண்ணாநோன்புன்னு இருந்தும் பல தவங்கள் புரிந்தும் தங்கள் உடலை வருத்திக்கிறாங்க.  உடல் நலியும்போது மனமும்  சக்தி இழந்து போகுதுன்றது அவரது  அவதானிப்பு.

கயாவுக்குப்போய்  அங்கே சுற்றித் திரிந்தபோது   ஃபால்குனி  நதிக்கரை வரை போயிட்டார். அங்கே வளர்ந்திருந்த ஒரு பெரிய அரசமரத்தின் (போதி மரம்)கீழ் உக்கார்ந்து   மனசை ஒருமுகப்படுத்தி சீரியஸா தவம் செஞ்சுருக்கார்.   மூணு பகலும் மூணு இரவும் அதே நிலை.  ஞானம் கிடைச்சது  மூணுநாள் ஆனதும்!   அப்புறம்தான்  இந்த இடத்துக்கு  தர்மபோதனை கிடைச்ச இடம் என்பதால் 'போதி கயா' என்ற பெயர்  வந்துருக்கு. இது கயா  என்ற ஊரில் இருந்து  13 கிமீ தூரத்தில் இருக்கு.

கயா,  ஹிந்துக்களுக்குப் புனிதமான தலம். இங்கே விஷ்ணு பாதம் இருக்கு என்பதால் இங்கே வந்து  குடும்பத்தில்  இறந்து போன மூத்தோர்களுக்கு  நீத்தார்கடனாக  பிண்டம் கொடுத்து பூஜை செஞ்சுட்டுப்போறாங்க.  அக்ஷய வடம் என்ற ஆலமரம் கயாவிலிருக்கு. அதன் வேர் ப்ரயாகை(அலஹாபாத்)  நடு உடம்பு காசி,  இலைகளுள்ள  நுனிபாகம்  கயாவிலிருக்குன்னு  ஐதீகம்.

ஞானம் அடைஞ்சதுக்கு அப்புறம் புத்தர் அஞ்சு வாரம் கழிச்சு  மீண்டும் ரிஷிப்பட்டணம்(ம்ருகதயா வனம்)  வந்துருக்கார். அதே சமண மடத்தில் இருந்த சமணர்களுடன் வாதம் செஞ்சு  வென்று  அங்கிருந்த பலரை தன் வசமாக்கினார். அதில் இருந்தவர்களில்  ஐவர் ,இவரை குருவாக ஏற்றதும் அவர்களுக்கு  தர்மத்தையும்  தன் ஞானத்தால் அறியப்பட்ட சமாச்சாரங்களையும் போதிச்சார்.(அந்த ஐந்து சிஷ்யர்களுக்கு  உபதேசம் செய்யும் சிலையைத்தான்  கொஞ்ச நேரமுன்  மூலகந்த குடி விஹாரில் போதி மரத்தடியில் நாம்  'மூலகந்தகுடிர் விஹார்    சாரநாத்' பதிவில் பார்த்தோம்.)

ஆதியில் அந்த  சமண மடம்   இருந்த இடத்தில்தான் இப்போ நிக்கறோம்.   சமணர்களின்  குருக்களான  தீர்த்தங்கரர்கள்  மொத்தம் 24 பேர். அதில் பதினோராவது தீர்த்தங்கரர் இங்கேதான்  ரிஷிபட்டணத்தில் பிறந்தார் என்கிறார்கள். ஆமாம்னு சொல்வது போல் ஒரு சமணக்கோவில் கோபுரம் தலைதூக்கி எட்டிப் பார்க்குது. அதை விட்டுட்டு இந்தப்பக்கமாவே  சுற்றுச்சுவர் கட்டி இருக்காங்க.

இது   சமண தீர்த்தங்கரர்களில்  11 வது தீர்த்தங்கர் ஷ்ரேயன்ஸ்நாத் பகவானின்  சிலை. சமணர்களும் சக்கரம்  வச்சுருக்காங்க. அதிலும் இந்த ஷ்ரேயன்ஸ்நாத்,  இக்ஷ்வாகு  வம்சத்தில் வந்தவராம். (ஸ்ரீ ராமரின் வழி?)  இவரும் பத்மாசனத்தில்தான் உக்கார்ந்துருக்கார்.  சமணம் பௌத்தம் ரெண்டுமே  ஏறத்தாழ ஒன்னுதானோன்னு  எனக்கு ஒரு சம்ஸயம்.  உணவுப்பழக்கம்  மட்டும் வெவ்வேறன்னு  நினைக்கிறேன்., கொஞ்சம் உள்ளே போய் ஆழ்ந்து  தெரிஞ்சுக்கணும் என்ற ஆசை வருது.  ஆனால் ஆசையே துன்பத்துக்குக் காரணமுன்னு புத்தர் சொல்லிட்டாரேன்னு.........  கொஞ்சம் யோசனை!

சமண மடம் புத்த மடமான பிறகுதான் இங்கே அசோகர் வந்துருக்கார்.  தன் பங்குக்கு ஒரு பெரிய  நினைவுச்சின்னம் புத்தருக்கு அமைக்கணுமுன்னு தோணுச்சு.  ஸ்தூபின்னா நாம் தூணென்றுதான் நினைக்கறோம். ஆனால் அவருக்கு ஒரு கட்டிடமே ஸ்தூபியா இருந்துருக்கு. அந்தக் காலத்து சுட்ட செங்கல் வச்சு  வட்டமா மேற்புறமும்,  அடிப்பாகத்துக்குக் கருங்கல்லுமா கட்டி இருக்கார்.

அது போகுதுநெடுநெடுன்னு ஒரு  ஒரு  28.3 மீட்டர் உசரம்.  அடிப்பாகத்தோட சுத்தளவு  33.53 மீட்டர்.  கீழே  அகலம் அதிகமா இருக்கு ஒரு  இருவது மீட்டர்   உயரம்வரை.  அதுக்குமேலே குறுகலாப் போகுது.  பெரிய அண்டாவைக் கவுத்துப்போட்டு, அதுக்கு மேலே   மீடியம் சைஸ் அடுக்கு குண்டாவை வச்சதுபோல்! (தெரிஞ்ச உதாரணம்தானே சொல்லமுடியும்?)

இம்மாம் பெரிய கட்டிடத்துக்குள்ளே (ஒரு வேளை  சமணர்களைப் புதைச்சுருப்பாங்களோன்ற  எண்ணம் வந்திருக்குமோ? )  என்னதான் இருக்கும் என்று ஒரு சமயம் அலெக்ஸாண்டர்  கன்னிங்ஹாம் என்ற சரித்திர ஆராய்ச்சியாளர் (இவர்தான் இந்தியத் தொல்லியல் மரபின் முன்னோடி),  ஸ்தூபிக்கு மேலிருந்து துளை போட்டு நூறடி வரை இறங்கிப்பார்த்துருக்கார்.  ஒரு பேழையில் புத்தரின் எலும்புகள் சிலதும் சில பூஜைப்பொருட்களும்தான் இருந்துச்சுன்னு  சொல்லி இருக்கார். மேலே போகும் ஸ்தூபி வேலை இன்னும் முடியாமல் இருக்குன்னு சொன்னதும் இவரே!

செங்கல்கள் எல்லாம் தரத்தில்  அதிசூப்பர் என்பதால்  ஊர்சனம் அப்பப்ப வந்து  கொஞ்சம் எடுத்துக்கிட்டுப் போயிருக்கு. நம்ம காசிராஜா கூட வந்து செங்கல் கொண்டு போனாராம்!  எப்படி பெயர்த்து எடுத்தாங்க?  அதான்  முகலாயர் ஆட்சியில்  காசி விஸ்வநாதர் கோவிலை இடிச்சுப்போட்டப்ப, கையோடு இங்கேயும்  வந்து  இடிச்சுத் தள்ளுனாங்க பாருங்க. அந்தக் குவியலில் இருந்து ஆளாளுக்குக் கொஞ்சம். இப்ப நாம் பார்ப்பது போனது போக மிச்சம்.

ஸ்தூபியைச் சுத்தி  நடைமேடை போட்டுருப்பதால் நமக்கும் வலம் வர முடியுது.   அகழ்வாராய்ச்சி செஞ்சபிறகு  ஸ்தூபி வரை போகவும் நல்லதா கல்பாவிய பாதை அமைச்சுருக்காங்க.  ரெண்டு பக்கமும் குட்டியாக் கம்பிவேலியும் அதை உள்ளே ஒளிச்சுவைக்கும் செடிகளுமா  ரொம்பநீட்டா இருக்கு.

எங்கெங்கே என்ன இருக்கு/ இருந்துச்சுன்ற வரைபடம் கூட வச்சுருக்காங்க.
ஸ்தூபியில் ப்ராம்மி எழுத்துக்களில் விவரங்களும் சித்திரங்களுமா  இருக்கு.  பக்தர்கள் இதிலும் தங்க ரேக்கை ஒட்டிவச்சுட்டுப் போயிருக்காங்க. ஸ்தூபியைப் பழுது பார்க்கும் வேலை நடக்குது. சாரம் கட்டி ஆட்கள் மேலே போய் வேலை  செய்றாங்க.

கம்பி வேலி ஒன்னு போட்டு அதுலே  கலர்க்கலரா  ப்ரேயர் ஃப்ளாக் ( Prayer Flag) என்னும்  ஜெபக்கொடிகளைக் கட்டி விட்டுட்டுப் போறாங்க பக்தர்கள். ஊதுவத்திக் கட்டுகள் கூட இருக்கு.  அவுங்களோட ப்ரார்த்தனைகள் எப்படின்ற விவரம் எனக்கில்லை:(

இந்திய அரசு இலச்சினை (நாலு சிங்கம்)  இருக்கும் அசோகர் தூண்கூட  இந்த வளாகத்தில்தான் இருக்கு.  ஜஸ்ட்  பாதித்தூண் மட்டுமே.  உடைச்சுப்போட்ட  மேல்பாகத்தை ம்யூஸியத்துக்குள்ளே வச்சுருக்காங்க.

காலி இடங்களில்  அழகுக்காகப் பூச்செடிகள் நடும் வேலையை உள்ளூர் தொழிலாளர்கள்  செஞ்சுக்கிட்டு இருக்காங்க.  வேலையில் கவனமே இல்லாமல் சுற்றுலாப்பயணிகளை வேடிக்கை பார்ப்பதிலேயே முக்காவாசி நேரம் போகுது.  அங்கே அந்தப் பக்கம் பார்க்கும் பயணிகளை இங்கே வாங்கன்னு கைநீட்டிக் கூப்பிட்டுக் 'கை  நீட்டறாங்க' :(

இதைச் சுத்திப்பார்த்ததும் வெளியே இருக்கும்  தொல்லியல் துறை ம்யூஸியத்துக்குள் போனோம்.  இங்கே படம் எடுக்க அனுமதி இல்லை.  தோண்டி எடுத்த பொக்கிஷங்களும், சரித்திரச்சான்றுகளும். சிற்பங்களுமா அட்டகாசமா இருக்கு.

தொல்லியல்துறையின்  அருங்காட்சியகங்களில் இதுதான் வயசில் மூத்தது.  அபூர்வசரித்திரச் சான்றுகளைப்பாதுகாக்கலாமேன்னு  1904 இல்  தனிக் கட்டிடம் கட்ட ஆரம்பிச்சு 1910 இல் பொதுமக்களுக்காகத் திறந்து வச்சுருக்காங்க.

சரித்திர ஆராய்ச்சியாளர்களுக்கு இது  வெல்லம்!  ஏகப்பட்ட சமாச்சாரங்கள். வெள்ளிக்கிழமை லீவு.  ஞாபகம் வச்சுக்குங்க.

வழக்கம்போல் நின்னு நிதானிக்க நமக்கு நேரம் இல்லை:(  வாசலில் இருக்கும் கடைகளில்  கைக்கடக்கமான புத்தரை  கொலுவுக்காக வாங்கிக்கிட்டுக் கிளம்பினோம்.

தொடரும்..............:-)