ஒரு அர்பன் விவசாயியின் அனுபவங்கள்! நன்றி தோழியே!

முதலில்  'நானும் ஓரு அர்பன் விவசாயிதான்' என்று ஒரு சமயம் சொன்ன  தோழிக்கு  முதல்மரியாதை. எனக்கென்னவோ  அவுங்க வாயில் இருந்து உதிர்ந்த முத்துக்கள் ரொம்பவே பிடிச்சுப்போச்சு! சட்னு பொறுக்கி எடுத்துக்கிட்டேன்.:-)   குச் காம் கோ ஆயேகா!!!


தோழி மாடித்தோட்டம் வச்சு அமர்க்களப்படுத்திக்கிட்டு இருக்காங்க. இந்தப்பயணத்தில் அங்கேயும் போய் தலையைக் காமிச்சுட்டு வந்தேன். சாம்பிள் படம் ஒன்னு இங்கே. பாக்கியை நம்ம பயணப்பதிவில் பார்த்துக்கலாம்!

 நிற்க....

நம்ம வீட்டுலே பச்சை வீடு போட்டது உங்களுக்குச் சொல்லி இருக்கேன்.  அப்பப் பார்க்காதவர்கள் இப்ப இங்கே போய் பார்த்துக்கலாம்.

டிசம்பர்   துவங்கி ஒரு பத்து நாளானபிறகு,  ஐயோ.... நம்ம சம்மரில் பத்து நாள் இப்படி குளிரும் காத்துமா வீணாகிப் போச்சேன்னு  கவலைப்பட்டக் கையோடு, க்ரீன் ஹவுஸ்ஸில் இருந்த  கருவேப்பிலை, வாழைமரம், கொய்யாச் செடிகளை வெளியில் சூரிய வெளிச்சத்துக்காகக் கொண்டு வந்து வச்சோம்.  வாழையில்  ஒருவிதமான  மாவுப்பூச்சின்னு  சொல்லும்  ஒயிட் ஃப்ளைஸ் ஒட்டிப்பிடிச்சு இருந்துச்சு.

நம்ம மாடித்தோட்டத் தோழிதான்  அவுங்க வீட்டுச் செடிகளுக்கு பெப்ஸி தெளிச்சேன்னு  சொன்னாங்க. நானும் இங்கே பெப்ஸி கிடைக்குதானு தேடிப்பார்த்து  வாங்கியாந்து ஒரே ஒருமுறை வாழைக்கு  ஸ்ப்ரே  செஞ்சேன்.  பூச்சீஸ் எல்லாம் கான்! போயே போச்!!!!!

கொஞ்சநாளைக்கு முன் டாய்லெட் சுத்தம் செய்ய  'இதை'ப் பயன்படுத்தலாமுன்னு சேதி வாசிச்ச நினைவு. இன்னும் சோதனை பண்ணிப் பார்க்கலை. ஆனா.....பசங்களுக்குப் பேதி மருந்து கொடுத்து வயித்துப்புழுக்கள் வெளியே வரவச்ச காலத்தை நினைச்சால்.... (அதுகளும் அந்த மருந்தைக்குடிக்கப் படாதபாடு படுத்தும். நான் எவ்ளோ  படுத்தி இருக்கேன் என் சின்னப்புள்ள வாழ்க்கையில்!)  பேசாம 'இதை'யே  வாரம் ஒருக்காக் கொடுத்துப்பிடலாம். அதுகளும் ஜாலியாக் குடிச்சுக்கும்:-)

முக்கிய செடிகள் எல்லாம் இப்போ வெளியில்தான் கொஞ்சநாள் இருக்கப்போகுது. அவுங்க இடத்தை வேஸ்ட் செய்யாமல்   வேற எதாவது   வச்சுப் பார்க்கலாமான்னு நினைச்சப்பதான் காய்கறி தோட்டம் போட்டுக்கலாம் என்ற ஐடியா நம்ம கோபாலுக்கு வந்துச்சு. (இப்படித்தான் சிலசமயங்களில் அவருக்கு நல்ல ஐடியாஸ் தோணிப்போகும்!  அவர் ஆசையை உடனே நிறைவேத்தினேன். அவர்  தினமும் தோட்ட வேலை  செய்வது  தியானம் செய்வதற்கு சமம் என்று சொல்லியிருக்கேன்) 


எங்கிட்டே கொஞ்சம் கீரை விதை இருந்துச்சு.நம்ம நியூஸியிலே  ஸ்பினாச் தவிர வேறு கீரைகள் கிடைக்காது.  ஃபிஜியில் இருந்து இந்தியன் கடைகளுக்கு வரும் கீரைக் கட்டு  வாங்கியாந்தப்ப, ஒரு சோதனைக்காக அதன் தண்டுகளை எடுத்து நட்டு வச்சுப் பார்த்தேன். அதுலே நாலைஞ்சு  முளைச்சு, அதை விதைக்கு விட்டு, அதுலே இருந்து கிடைச்ச விதைகள் இவை. ஒரு தொட்டியிலே நட்டு வச்சது  ஒருவாரத்துலே முளைக்க ஆரம்பிச்சது.

இதுவரை  மூணுமுறை மேலாக மட்டும்  எடுத்து  சமைச்சாச்சு!  நாசுக்கா  அறுத்தெடுக்கணுமுன்னு  சின்னூண்டு ப்ரூனிங் சிஸ்ஸர்ஸ் வாங்கியாந்தேன்:-)


தமிழ்நாட்டுலே கிடைக்கும் கீரை வகைகள் என்னைப் பெருமூச்சு விடவைக்கும் என்றாலும் தப்பித்தவறி ஒரு விதையை  நாட்டுக்குள்ளே கொணாரமுடியாது. நாய் புடிச்சிரும்! புடிச்சா?  குறைஞ்சபட்சம்  $ 200  அபராதம்:-((((

சமிபத்துலே  ஃபிஜியில் இருந்து  வந்த கோங்கூராவை ஒரு இந்தியன் கடையில் வாங்கினோம். வழக்கத்துக்கு மாறா  தண்டுகளோடு இருந்துச்சு. ஆஹான்னு தண்டுகளை நட்டுக் காப்பாத்திக்கிட்டு இருக்கேன்.  ஒன்னே ஒன்னு மட்டும் துளிர் விட்டுருக்கு!

நம்ம வீட்டுலே முக்கால்வாசி கண்டெய்னர் கார்டன் தான்.  வேலியோரமா மட்டும்  கொஞ்சூண்டு இடம் விட்டு ரோஜாச் செடிகள் வச்சுருக்கோம்.  புல்வெளி போக மீதி இடத்துலே பொடிவகை கூழாங்கற்கள்  நிரவி இருந்தோம்.  களை பிடுங்கும்  வேலையை ஒழிச்சுக்கட்ட. ( ஒழிச்சுக்கட்ட முடியலை என்பது இன்னொரு சோகம்:(நாமொன்று நினைத்தால் களையொன்று நினைக்குது!)


பீன்ஸ் போட்டால் அவ்வளவா வேலை இல்லன்னு கேள்விப்பட்டு  மார்கெட்டில் இருந்து  பீன்ஸ் நாத்துகள் வாங்கி வந்து வெளியில் தரையில் நட்டு வச்சோம். கடைசியில் அது ப்ராட் பீன்ஸ் செடிகளா இருந்துச்சு. நல்ல ருசி. ஆனால்  ஒரே சமயத்தில் காய்ச்சுட்டு நின்னுருது.

இங்கே  விதைகளை வாங்கியாந்து நட்டு வச்சு அது முளைக்குமா முளைக்குமான்னு தேவுடு காப்பதை விட  நாத்துகளாவே வாங்கிட்டால்  கவலை மிச்சம். கார்டன் செண்டர்களில் கொஞ்சம் விலை கூடுதல். ஆனால்  அதே செடிகள் நம்ம ஞாயித்துக்கிழமை சந்தையில் கிடைக்கும்.


விலை என்னவோ  எதையெடுத்தாலும்  ரெண்டு டாலர்!  கத்தரிக்காய் ,மிளகாய், வெள்ளரின்னா  ரெவ்வெண்டு   நாத்துகள்.  லெட்டூஸ் ஒரு  அஞ்சு வகை,  பச்சைப் பட்டாணி, பாலக் (ஸ்பினாச்) இன்னும் கூட என்னென்னவோ  இருக்கு.  நாங்க வாங்கிக்கலை. முதல்லே  இதை வச்சுப் பார்த்துட்டு  அடுத்த வருசம் பொழைச்சுக் கிடந்தால் இன்னும் கொஞ்சம் அதிகமான வகைகளை வாங்கினால் போச்சு.

ஆரம்ப ஜோரில்  நாத்து விஷயம் தெரியாம,  விதைப்பொட்டலம் ரெண்டு (ரன்னர் பீன்ஸ்,  ஸுக்கினி ) வாங்கி வந்து தோட்டத்தில் ரோஜாவாண்டை நட்டு வச்சோம். இப்பத்தான் பீன்ஸ் பூ விட்டுருக்கு.

நாம் வாங்குன செடிகள் எல்லாம்  மூணு, நாலு மாசத்துக்குள்ளே பலன் தரும் வகைகள்தான். நம்ம சம்மரோ எண்ணி மூணேமாசம். அதுக்குள்ளே  அறுவடை செஞ்சு தின்ன முடியுமான்னு பார்க்கணும், இல்லே?

வெள்ளரிக்காய் மட்டும்  ஜம்முன்னு  முளைச்சு  காய்ச்சுருக்கு.  Telegraph, lebanese ரெண்டு வகைகள்.  'விளைஞ்சு சரியான பருவத்தில் இருக்கும்போது, நான் ரெடின்னு தந்தியடிச்சுச் சொல்லுமா'ன்னு நம்ம அமைதிச்சாரல் கேட்டாங்க.  டக் டகடக, டக் டக் ன்னு  சொல்லிவச்சேன். பறிச்சு வந்து  பொங்கலுக்கு வச்சு சாமி கும்பிட்டுட்டு நறுக்கிப் பார்த்தால்.....இந்த வெள்ளரிக்குக்கூட , நம்மூர்லே தந்தி சேவை நிறுத்திட்டாங்கன்னு  தெரிஞ்சுருக்கு!

கீழே.... தந்தி நினைச்சது தபாலாப் போயிருச்சு:(

என்னிடம் இருக்கும் கெட்ட பழக்கங்களில் ஒன்னு , வாழ ஆசையா இருக்குன்னு லேசா ஒரு கோடி காமிச்சாப்போதும், குழியைத்தோண்டி புதைச்சுருவேன். வெள்ளை வெங்காயம் நடணும் இன்னிக்கு:-)

கார்டன்  லுக் & ஃபீல் வேணுமுன்னு ஒரு பார்க் பெஞ்ச் வாங்கியாந்து போட்டால்....  ஓக்கே!  தேங்க்ஸ்ன்னு   தனக்காக எடுத்துக்கிட்டான் ரஜ்ஜு!

 இந்த 20 டிகிரிக்கே க்ரீன்ஹவுஸில் வெக்கை அதிகமா இருக்குன்னு  வாடி நிற்கும் செடிகளுக்காக  குடை போட்டுருக்கார்  நம்மூட்டு பேகன்!

இந்தப் பதிவு  மாடித்தோட்ட நிபுணரும்,  பிரபல எழுத்தாளருமான  ராமச்சந்திரன் உஷாவுக்குச் சமர்ப்பணம்.  தலைப்பு உதவிக்கு  நன்றி, எழுத்தாளர் ஏகாம்பரியே!


PIN குறிப்பு:  அறுவடைகள்,  அவ்வப்போது  வெளியிடுவேன்:-)